Thursday, July 22, 2010

កម្លាំងចិត្តពេលរួញរាអស់សង្ឃឹម

កម្លាំងចិត្តពេលរួញរាអស់សង្ឃឹម


នៅពេលដែលយើងអស់កម្លាំងចិត្ត ព្រោះនឿយហត់ជាមួយជីវិតហួសពេក ឫព្រោះអស់សង្ឃឹមក្នុង
របស់ដែលយើងប្រាថ្នាក៏ដោយ ពេលនោះយើងតែងមានអារម្មណ៍មិនចង់ឈានដើរតទៅមុខទៀត
សូម្បីតែមួយជំហាន ដោយសារយើងមានអារម្មណ៍ថាវាហាក់ដូចជាអស់កម្លាំងចិត្ត ល្ហិតល្ហៃខ្លាំង
ណាស់។

ពេលយើងខ្វះកម្លាំងចិត្ត យើងតែងសម្លឹងរកមើលកម្លាំងចិត្តនោះពីអ្នកដទៃ តែតាមការពិតនោះមាន
តែខ្លួនយើងខ្លួនឯងប៉ុណ្ណោះដែលអាចដាស់តឿនលួងលោមខ្លួនឯងបានល្អបំផុត។

ព្រោះទោះបីជាមាននរណាម្នាក់មកឲ្យកម្លាំងចិត្តក៏ដោយ ក៏មិនអាចធ្វើឲ្យយើងមានអារម្មណ៍ស្រស់
ស្រាយសប្បាយចិត្តបានឡើយ ដោយសារយើងបានយកចិត្តទៅចងភ្ជាប់នឹងមនុស្សដទៃឫរបស់ដទៃ
ផ្សេងទៀត រហូតមិនអាចមើលឃើញគុណតម្លៃរបស់មនុស្សដែលកំពុងឲ្យកម្លាំងចិត្តដល់យើងក្នុង
ខណៈនោះបានទៅហើយ។

ហើយទោះថាយើងត្រូវនៅឯកោម្នាក់ឯងក្តី ថ្ងៃដែលយើងរកមើលនរណាក៏មិនជួបប្រទះសោះនោះ
យើងក៏ត្រូវចេះធ្វើជាមិត្តជាមួយខ្លួនឯង ចាំលួងលោមនិងឲ្យកម្លាំងចិត្តដល់ខ្លួនឯង​ កុំជាន់ថែមថា
ជាកំហុសឆ្គងរបស់ខ្លួនឯង កុំបង្រៀនឲ្យខ្លួនឯងចេះបន្ទោស ឫទម្លាក់កំហុសលើអ្នកដទៃ តែប្រាប់
ខ្លួនឯងឲ្យទទួលស្គាល់នូវរឿងដែលបានកើតឡើង និយាយជាមួយខ្លួនឯងថាយើងនឹងសន្សឹមៗ​
រកមធ្យោបាយឈានតទៅមុខទៀត ធ្វើឲ្យខ្លួន​ឯងឃើញថា បើយើងរួញរាអស់កម្លាំងចិត្តរហូតដល់
បោះបង់ចោលហើយនោះនឹងមានលទ្ធផលដូចម្តេចខ្លះ ហើយបើស៊ូតទៅទៀតនឹងល្អប្រសើរឡើង
ដូចម្តេចខ្លះ។

បើយើងរួញរាព្រោះអស់សង្ឃឹម ឲ្យសាងក្តីសង្ឃឹមជាថ្មី។
បើយើងរួញរាព្រោះហត់នឿយ ឲ្យសម្រាកហើយចាំចាប់ផ្តើមជាថ្មី។
បើយើងរួញរាព្រោះធុញទ្រាន់ ឲ្យសាកល្បងផ្លាស់ប្តូរអ្វីថ្មីៗ។

កាលបើអ្វីៗ ទាំងអស់វានៅខ្ពស់ហួសសមត្ថភាពការគ្រប់គ្រងរបស់យើង ពេលនោះយើងតែងមាន
អារម្មណ៍រួញរាអស់កម្លាំងចិត្ត ហើយវិធីហៅកម្លាំងចិត្តឲ្យត្រឡប់មកវិញវាជារឿងងាយទេ​ គឺគ្រាន់តែ
សាងសេចក្តីជឿជាក់លើខ្លួនឯងឲ្យកើតឡើងបានម្តងទៀតប៉ុណ្ណោះ ដូចជាធ្វើការផ្លាស់ប្តូរអ្វីម្យ៉ាង
រៀបចំដំនើរការចាត់របៀបជីវិតជាថ្មីជាដើម។ ពេលយើងក្តោបក្តាប់គ្រប់យ៉ាងបានល្អល្មមសមគួរហើយ
នោះ យើងក៏នឹងត្រឡប់មានអារម្មណ៍ល្អឡើងវិញជាក់ជាមិនខាន តែកុំភ្លេចថាបតិបត្តិការទាំងនេះត្រូវ
ដំនើរទៅសន្សឹមៗ គ្មានអ្វីល្អទាំងស្រុងគ្រប់បែបយ៉ាងដូចចិត្តយើងប្រាថ្នានោះទេ

0 comments:

Post a Comment

 
ឡើងទៅខាងលើទំព័រ ចុះទៅខាងក្រោមទំព័រ