Monday, July 5, 2010

ធនធាន​ធម្មជាតិ​នៅ​ដែន​ដី​កម្ពុជា​ក្រោម (ភាគ​៤)

ដោយ មឿង ទុម
2010-03-14

ដែន ​ដី​កម្ពុជា​ក្រោម​ឬ​កូសាំងស៊ីន ត្រូវ​បាន​គេ​ហៅ​ជា​ភាសា​អង់គ្លេស​ថា Mekong Delta ឬ​ដែនដី​សណ្ត​ទន្លេ​មេគង្គ ឋិត​នៅ​ភាគ​ខាង​ត្បូង​នៃ​ប្រទេស​វៀតណាម​បច្ចុប្បន្ន។

Photo supplied

ព្រះ​សង្ឃ​ពុទ្ធ​សាសនា​ខ្មែរ​កម្ពុជា​ក្រោម​ច្រូត​ស្រូវ​នៅ​ក្នុង​ទឹក​ដី​កម្ពុជា​ក្រោម (ក្នុង​ប្រទេស​វៀតណាម)

លោក ឆាលស៍ អេហ្គ័រ (Charles Agar) ជា​ជន​បរទេស​ម្នាក់​បាន​សរសេរ​សៀវភៅ​ប្រវត្តិសាស្រ្ត​មួយ​ក្បាល​មាន​ចំណងជើង ​ថា "វៀតណាម​រួម​ទាំង​អង្គរ​វត្ត" បោះ​ពុម្ព​ផ្សាយ​តាំង​ពី​ឆ្នាំ​២០០៦​មក បាន​ឲ្យ​ដឹង​ថា Mekong Delta ឬ​កម្ពុជា​ក្រោម មាន​ដី​មួយ​ផ្នែក​ទំហំ​ប្រមាណ ៦​ម៉ឺន​គីឡូ​ម៉ែត្រ​ការ៉េ ឋិត​នៅ​តាម​ដង​ទន្លេ​មេគង្គ​ដែល​ហូរ​កាត់​បី​ខេត្ត។ ក្នុង​ចំណោម​ប្រជាពលរដ្ឋ ១៧​លាន​នាក់​នៅ​ទូទាំង​កម្ពុជា​ក្រោម ក្នុង​នោះ​រួម​ទាំង​ខ្មែរ​ក្រោម​ម្ចាស់​ស្រុក​ផង គឺ​ភាគ​ច្រើន​ប្រកប​របរ​កសិកម្ម​និង​នេសាទ។

សហព័ន្ធ​ខ្មែរ​កម្ពុជា​ក្រោម​បាន​ឲ្យ​ដឹង​ថា បច្ចុប្បន្ន​មាន​ប្រជាពលរដ្ឋ​ខ្មែរ​ក្រោម​ទាំង​អស់​ប្រមាណ ៨​លាន​នាក់​រស់​នៅ​លើ​ដែន​ដី​កម្ពុជា​ក្រោម។

កសិករ​ខ្មែរ​ក្រោម​មួយ​រូប​អាយុ ៤០​ឆ្នាំ សុំ​ជម្រាប​ឈ្មោះ​ជា​អក្សរ​កាត់ គឺ ល.រ. ស ធ្វើ​ជា​គ្រូ​បង្រៀន​ផង រស់​នៅ​ក្នុង​ខេត្ត​ឃ្លាំង ដែល​វៀតណាម​ហៅ​ថា សុកទ្រាំង នៅ​ឯ​ដែន​ដី​កម្ពុជា​ក្រោម មាន​ប្រសាសន៍​ឲ្យ​វិទ្យុ​អាស៊ីសេរី​ដឹង​បន្ថែម​អំពី​របរ​កសិកម្ម​នៅ​ទី​នោះ ៖ «របរ​សំខាន់​នោះ​គឺ​អាជីវកម្ម​ធ្វើ​ស្រែ​ចម្ការ។ ស្រូវ​ធ្ងន់​បូរាណ​របស់​យើង វា​ជិត​អស់​ទៅ​ហើយ ១០​ភាគ​នៅ​សល់​តែ ១​ភាគ​ទេ។ ឥឡូវ​ហ្នឹង​ស្រែ​គេ​បង្ក​បង្កើន​ផល ១​ឆ្នាំ ៣​រដូវ ។ ឥឡូវ​ហ្នឹង​គេ​ធ្វើ​ស្រូវ ៣​ខែ​ហ្នឹង​ច្រើន​បំផុត​លេខ​១ គេ​ហៅ​ស្រូវ​ស្រាល ស្រូវ​បង្កើន​រដូវ។ ឥឡូវ​ហ្នឹង​គេ​នៅ​តំបន់​ខ្ញុំ​នេះ ១​កុង​ស្ថិតិ​ពិត​ប្រាកដ​គឺ​បាន​ប្រមាណ​ពី ២៥ ទៅ ៣០​ថាំង​ដោយ​តំបន់»។

បណ្តាញ​វ៉ឹបសាយថ៍​របស់​ទស្សនាវដ្តី​ខ្មែរ​កម្ពុជា​ក្រោម​បាន​ឲ្យ​ដឹង​ដែរ ​ថា នៅ​តាម​ដង​ទន្លេ​មេគង្គ​ក្នុង​ដែន​ដី​កម្ពុជា​ក្រោម មាន​ដី​ស្រែ​និង​ដី​ព្រៃ​ទំហំ​ប្រមាណ ៤​ម៉ឺន​គីឡូម៉ែត្រ​ការ៉េ។ អ្នក​និពន្ធ​សៀវភៅ​"វៀតណាម​រួម​ទាំង​អង្គរ​វត្ត" លោក ឆាលស៍ អេហ្គ័រ បាន​ឲ្យ​ដឹង​បន្ត​ថា ដី​កម្ពុជា​ក្រោម​មិន​ត្រូវ​បាន​គេ​ទុក​ឲ្យ​ទំនេរ​ឡើយ គឺ​ភាគ​ច្រើន​គេ​ដាំ​បំពេញ​ដោយ​ស្រូវ​លិច​ទឹក។ ការ​ធ្វើ​ស្រែ​នៅ​កម្ពុជា​ក្រោម គេ​ប្រើ​ទាំង​រហាត់​បូម​ទឹក​រហូត​ដល់​ម៉ាស៊ីន​បូម​ទឹក។ ស្រូវ​ជា​ធនធាន​សំខាន់​បំផុត ចាត់​ជា​ជន្ទល់​សេដ្ឋកិច្ច​ជាតិ​និង​ស្បៀង​របស់​ប្រទេស​វៀតណាម។

លោក ឆាលស៍ អេហ្គ័រ អះអាង​បន្ត​ថា Mekong Delta ឬ​កម្ពុជា​ក្រោម ជា​ជង្រុក​ស្រូវ​របស់​វៀតណាម។ កម្ពុជា​ក្រោម​អាច​ផលិត​ស្រូវ​បាន​ដល់​ទៅ ៥០%​នៃ​ផលិតផល​ស្រូវ​ទាំង​អស់​នៅ​ទូទាំង​ប្រទេស​វៀតណាម។

សៀវភៅ "វៀតណាម​រួម​ទាំង​អង្គរ​វត្ត" បញ្ជាក់​ថា ផលិតផល​ស្រូវ​នៅ​កម្ពុជា​ក្រោម​បាន​ធ្វើ​ឲ្យ​ប្រទេស​វៀតណាម​ជាប់​ចំណាត់​ ថ្នាក់​ខ្ពស់ ជិត​ស្មើ​នឹង​ប្រទេស​ថៃ ជប៉ុន និង​អាមេរិក​ខាង​លិច ក្នុង​ការ​នាំ​ស្រូវ​ចេញ​ទៅ​លក់​ឯ​បរទេស។ កាល​ពី​ក្នុង​អំឡុង​ពេល ៤​ខែ​នៃ​ដើម​ឆ្នាំ​២០០៥ វៀតណាម​អាច​នាំ​ស្រូវ​ចេញ​បាន​ដល់​ទៅ ១​លាន​តោន លើស​ពី​ឆ្នាំ​២០០៤ ២៥%។ ក្នុង​នោះ​វៀតណាម​បាន​នាំ​ស្រូវ​ចំនួន ៥​សែន​៥​ពាន់​តោន​បញ្ជូន​ចេញ​លក់​ក្នុង​តំបន់​អាស៊ី រួម​មាន​លក់​ទៅ​ប្រទេស​ហ្វីលីពីន​បាន​ជាង ៤​សែន​តោន។

លោក ថាច់ ង៉ុកថាច់ ប្រធាន​សហព័ន្ធ​ខ្មែរ​កម្ពុជា​ក្រោម​ប្រចាំ​ទ្វីប​អាមេរិក​ខាង​ជើង​និង​អឺរ៉ុប មាន​ប្រសាសន៍​ថា ៖ «ដែន ​ដី​កម្ពុជា​ក្រោម​គឺ​ជា​ដែន​ដី​សំបូរ​ទៅ​ដោយ ពិសេស​គឺ​ដំណាំ​ស្រូវ​ហ្នឹង​តែម្តង។ យើង​ឃើញ​សព្វ​ថ្ងៃ​ហ្នឹង ប្រទេស​យួន​ទាំង​មូល​បាន​ទឹក​ដី​កម្ពុជា​ក្រោម យួន ៨០​ប្លាយ​លាន​នាក់ គឺ​រស់​ដោយសារ​អង្ករ​ស្រូវ​នៅ​លើ​ទឹក​ដី​កម្ពុជា​ក្រោម​តែម្តង»។

អ្នក​និពន្ធ​ជា​ជន​បរទេស​ម្នាក់​ទៀត​ឈ្មោះ ដូក្លាស អេ. ហ្វីលីបស៍ (Douglas A. Phillips) សរសេរ​សៀវភៅ​មួយ​ក្បាល​ដាក់​ចំណងជើង​ថា "វៀតណាម" បោះ​ពុម្ព​ផ្សាយ​តាំង​ពី​ឆ្នាំ​២០០៦​មក បាន​ឲ្យ​ដឹង​បន្ថែម​ថា ដែន​ដី​កម្ពុជា​ក្រោម ឬ Mekong Delta ជា​តំបន់​សំខាន់​មួយ​ក្នុង​ចំណោម​តំបន់​សំខាន់​ៗ​ទាំង​បី​របស់​ប្រទេស​ វៀតណាម​បច្ចុប្បន្ន។ វៀតណាម​ហៅ​កម្ពុជា​ក្រោម ឬ Mekong Delta ថា តំបន់ ណាំ បូ (Nam Bo) ព្រោះ​ជា​តំបន់​ដែល​ឋិត​នៅ​ផ្នែក​ខាង​ត្បូង​នៃ​ប្រទេស​វៀតណាម។

លោក ដូក្លាស អេ. ហ្វីលីបស៍ បញ្ជាក់​ថា កម្ពុជា​ក្រោម ឬ ណាំ បូ ជា​រោងចក្រ​ផលិត​សេដ្ឋកិច្ច​ជាតិ​សម្រាប់​វៀតណាម ដែល​រាប់​សិប​ឆ្នាំ​មក​នេះ​កម្ពុជា​ក្រោម​តែង​ផ្តល់​ភោគ​ទ្រព្យ​ដែល​មាន​ តម្លៃ​ស្មើ​នឹង​ពាក់​កណ្តាល​នៃ​ធនធាន​របស់​ប្រជាជាតិ​វៀតណាម​ទាំង​មូល។ ក្រុង​ព្រៃនគរ ដែល​វៀតណាម​ហៅ​ថា ក្រុង​សៃហ្គន ឬ​ហូជីមិញ ឋិត​នៅ​ក្នុង​ដែន​ដី​កម្ពុជា​ក្រោម ឬ ណាំ បូ មាន​ដី​កសិកម្ម​ដែល​ប្រកប​ទៅ​ដោយ​ជីជាតិ​ល្អ​ណាស់។ ក្រៅ​ពី​ដំណាំ​ស្រូវ កម្ពុជា​ក្រោម​មាន​ដាំ​ដំណាំ​កសិកម្ម​ជា​ច្រើន​មុខ​ទៀត ដែល​វៀតណាម​បាន​នាំ​ចេញ​ទៅ​លក់​នៅ​ឯ​បរទេស​ដែរ។

បុរស​ខ្មែរ​ក្រោម​ម្នាក់​សូម​ជម្រាប​ឈ្មោះ​ជា​អក្សរ​កាត់ គឺ ដ.រ លោក​កំពុង​រស់​នៅ​ក្នុង​ខេត្ត​ក្រមួន​ស ដែល​វៀតណាម​ហៅ​ថា រ៉ាច់យ៉ា នៅ​ឯ​ដែន​ដី​កម្ពុជា​ក្រោម មាន​ប្រសាសន៍​ឲ្យ​វិទ្យុ​អាស៊ីសេរី​ដឹង​បន្ថែម​អំពី​ដំណាំ​កសិកម្ម​កម្រិត​ គ្រួសារ​ដែល​ប្រជាពលរដ្ឋ​ខ្មែរ​ក្រោម​ដាំ​នៅ​កម្ពុជា​ក្រោម។

លោក ដ.រ បាន​បញ្ជាក់​ថា ៖ «ដាំ​មាន​ដាំ​ដំណាំ​ដូច​ជា​ត្រាវ ស្ពៃ ម្រះ​អី​ជាដើម។ ចម្ការ​មាន​ត្រឹម ១​ហិកតា ក្រោម ១​ហិកតា មាន​ដើម​មៀន ដើម​ក្រូច អម្ពរ តែ ល្មុត​តិច​ទេ ភាគ​ច្រើន​ដាំ​ធុរេន​ច្រើន។ ខេត្ត​ព្រះត្រពាំង​បាន​ដាំ​ច្រើន​គឺ​អំពៅ»។

សៀវភៅ​របស់​អ្នក​និពន្ធ ដូក្លាស អេ. ហ្វីលីបស៍ បាន​ឲ្យ​ដឹង​ថា ដំណាំ​កសិកម្ម​ជា​ច្រើន​ប្រភេទ​ទៀត​ដែល​មាន​ដាំ​នៅ​កម្ពុជា​ក្រោម គឺ​រួម​មាន​ពោត សណ្តែក​សៀង កាហ្វេ តែ ដូង ម្រេច និង​កៅស៊ូ។ កសិករ​ក៏​មាន​ចិញ្ចឹម​សត្វ​ដែរ ដូច​ជា​មាន់ ទា ជ្រូក គោ ក្របី និង​ចិញ្ចឹម​ត្រី​ជាដើម។

លោក តឹង ម៉ាន់រិន នាយក​ផែនការ​នៃ​សហព័ន្ធ​ខ្មែរ​កម្ពុជា​ក្រោម មាន​ដើម​កំណើត​នៅ​ឯ​ដែន​ដី​កម្ពុជា​ក្រោម​ដែរ តែ​សព្វ​ថ្ងៃ​រស់​នៅ​ក្នុង​ទីក្រុង​ហ្វីឡាឌេលហ្វៀ រដ្ឋ​ផិនស៊ីលវេញ៉ា សហរដ្ឋ​អាមេរិក មាន​ប្រសាសន៍​ថា នៅ​ខេត្ត​ឃ្លាំង​ជា​ស្រុក​កំណើត​របស់​លោក ដែល​សព្វ​ថ្ងៃ​វៀតណាម​ហៅ​ថា សុកទ្រាំង សំបូរ​ខ្លាំង​គឺ​បង្គារ។

លោក តឹង ម៉ាន់រិន បាន​ឲ្យ​ដឹង​ថា ៖ «ត្រី​ខាង​ទឹក​សាប​ហ្នឹង វា​គ្រប់​ធន់​ត្រី​ច្រើន​ដែរ។ តែ​សព្វ​ថ្ងៃ​ច្រើន​បំផុត​ហ្នឹង បង្គារ​ៗ​ធំ​ៗ​ប៉ុន​ៗ​មេ​ជើង។ សំបូរ​បង្គារ​ណាស់ បង្គារ​រាប់​ពាន់​តោន។ តំបន់​ខ្ញុំ​ស្រុក ញួរ​នោះ សព្វ​ថ្ងៃ​គេ​ឈប់​ធ្វើ​ស្រែ ហើយ​គេ​ចិញ្ចឹម​បង្គារ​ហ្នឹង​វិញ។ ខ្ញុំ​នៅ​ជ្រោយ​ញ ខេត្ត​ឃ្លាំង តែ​ឥឡូវ​ហ្នឹង​ខេត្ត​ឃ្លាំង តែ​ពី​មុន​មក​គឺ​ជា​ខេត្ត​ពល្លាវ»។

ពលរដ្ឋ​ខ្មែរ​ក្រោម​ម្នាក់​ទៀត សព្វ​ថ្ងៃ​រស់​នៅ​ក្នុង​ខេត្ត​ឃ្លាំង​នោះ​ដែរ មាន​ប្រសាសន៍​ឲ្យ​វិទ្យុ​អាស៊ីសេរី​ដឹង​បន្ថែម​ថា ខេត្ត​ឃ្លាំង​ក៏​សំបូរ​ច្រើន​ដែរ​នូវ​ត្រី​រ៉ស់ ឬ​ត្រី​ផ្ទក់ ៖ «ត្រី​ដែល​សំបូរ​ជាង​គេ​គឺ​ត្រី​រ៉ស់ ដែល​យើង​ហៅ​ថា ត្រី​ផ្ទក់​នោះ គឺ​សំបូរ​លេខ​១»។

ចំណែក​នៅ​ក្នុង​ដែន​ទឹក​ប្រៃ​ឬ​សមុទ្រ​វិញ ដូច​ជា​នៅ​កោះ​ត្រល់ ដែល​វៀតណាម​ហៅ​ថា កោះ​ភូក្វុក ដែល​ជា​ដែន​ដី​កម្ពុជា​ក្រោម​ដែរ​នោះ សំបូរ​ត្រី​និង​សត្វ​សមុទ្រ រួម​មាន​ប្រភេទ​ត្រី​ពិសេស​ម្យ៉ាង​ដែល​វៀតណាម​ចម្រាញ់​រាប់​ពាន់​តោន​ជាមួយ​ នឹង​កំពឹស​ដើម្បី​ធ្វើ​ជា​ទឹក​ត្រី​មាន​រស​ជាតិ​ឈ្ងុយ​ឆ្ងាញ់ លក់​ចេញ​ទៅ​បរទេស​ក្នុង​មួយ​ឆ្នាំៗ​បាន​រាប់​លាន​លីត្រ។

កម្ពុជា​ក្រោម​មាន​ទំហំ​ជិត​ស្មើ​នឹង​ពាក់​កណ្តាល​នៃ​ដី​ប្រទេស​កម្ពុជា​ សព្វ​ថ្ងៃ ជា​ដែន​ដី​ខាង​កើត​របស់​ប្រទេស​កម្ពុជា ប៉ុន្តែ​ត្រូវ​បាន​អាណានិគម​បារាំង​ប្រគល់​ឲ្យ​វៀតណាម​កាន់កាប់​ជា​ផ្លូវការ ​ដោយ​ដាក់​បញ្ជូល​ទៅ​ជា​ដែន​ដី​ភាគ​ខាង​ត្បូង​របស់​ប្រទេស​វៀតណាម តាំង​ពី​ពាក់​កណ្តាល​ឆ្នាំ​១៩៤៩​មក​ដល់​បច្ចុប្បន្ន៕

0 comments:

Post a Comment

 
ឡើងទៅខាងលើទំព័រ ចុះទៅខាងក្រោមទំព័រ